أخبار عاجلة
[huge_it_slider id="1"]

كفاية بقى علمانية وإسلامية .. تعبنا بجد!

اقوال وحكم مأثورة.jpg
مش ممكن نركز شوية على بناء بلدنا .. على حل المشاكل .. على النهوض بمصر .. زهقنا من كل التارات القديمة بينكم وبين بعض .. وبينكم وبين الدولة .. دا شعب عايز يفكر في بكرة مش في امبارح .. عايز يحل مشاكلة مش تزودوها عليه .. بصوا لقدام ..
 
إذا مش عايزين تمدوا إيديكم لبعض اسكتوا شوية بقى واشتغلوا .. اعملوا أي حاجة لمصر .. حاتستفيدوا إيه إننا كلنا نبقى وحشين .. بطريقتكم دي نصنا طلعنا كفرة ونصنا طلعنا إرهابيين .. أمال فين المصريين المحترمين ..
 
رحنا فينا كلنا اللي بنحب وبنحترم الدين بس مش إسلاميين .. والله أكثرنا متدينيين .. بس مش لازم نكون في جماعات دينية علشان ندخل الجنة .. ارحمونا بقى ..
 
ورحنا فين كلنا اللي بنحب الحياة الكريمة والحرة والانفتاح على العالم .. بس مش ليبراليين .. والله أكثرنا بنحب الحريات .. بس مش لازم نكون من أنصار الانحلال علشان ندخل الدنيا ونشارك في الحياة .. ارحمونا بقى
 
يا تيارات الإسلاميين .. اشتغلوا لمصر بدل ما تشتغلوا للجماعات .. صدقوني مش حاينفعنا أبداً إن الوسائل تتحول لغايات .. بدل ما تقضوا وقتكم تدوروا على مشاكل العلمانيين زي ما أحيانا تسموا الناس اللي مش معاكم .. اشتغلوا للشعب المصري .. لينا كلنا .. كفاية بهدلة في الناس .. احنا المصريين والله عارفين مين كويس ومين مش كويس وحانعرف نختار ..
 
ساعدونا نحل مشاكلنا ما تزودوش علينا الهموم يارب يبارك فيكم .. كفاية بقى .. الواحد مش حايدخل الجنة بس بإنه يفضح الناس التانيين .. طب ما ممكن ندخل الجنة واحنا بننفع الناس ونكون بكده كمان من خير الناس .. أنا عارف إنكم على المدى الطويل حاتخسروا كثير بالطريقة دي لأن المصريين بجد زهقوا على الآخر من الكلام والطريقة اللي شغالة طول الفترة اللي فاتت .. ركزوا على حل مشاكل الناس تكسبوا الناس ورضا رب الناس وتحببوا العالم كله في الإسلام ..
 
حلوا مشاكل الناس .. بدل ما بالعافية عايزين تفرضوا عليهم حاجات هما مش جاهزين ولا مرتاحين لها دلوقت ويمكن يكونوا صح وانتم الغلطانيين .. والله احنا شعب كويس وبنحب بجد الدين .. وعارفين إزاي نحافظ عليه .. ما احنا حافظنا عليه طوال 1400 سنة وانتم ما كنتوش هنا .. مش كده والا إيه .. ماتخافوش على المصريين .. وما انتوش محتاجين تغيرونا علشان نبقى شبه ناس تانيين ..
احنا ممكن نطور بلدنا ونحافظ على ديننا واحنا زي ما احنا مصريين .. دمنا خفيف وضحكتنا تنور الدنيا وحبنا للدين مش مخلينا خايفين من الدنيا ولا مش عارفين ربنا بس ساعات بنروح شوية بعيد .. بس بنرجع دايماً تاني للدين .. ما تخافوش علينا .. خليكوا معانا وما تصدقوش أبدا إنكم أحسن مننا كلنا والا انتم فوقنا ولا أنتم كمان تحتنا ولا حتى جببنا .. خليكونا معانا جوا مصر مش على طرفها وصدقوني عمرنا ما نخلي مصر كويسة واحنا على هامشها ابدا .. خليكوا معانا يارب يبارك فيكم .. وما تبعدوش عن وسط مصر .. زي ما كنتم معانا في التحرير!
 
ويا تيارات الفكر الليبرالي والتحرري .. اشتغلوا لمصر بدل ما تنشغلوا بالعالم برة عايز منكم إيه .. صدقوني عمر ما في حد من برة حايحب مصر أكثر من ولادها .. ولا حد حايعرف مصلحتها أكثر من أهلها .. وبدل ما تقضوا وقتكم كله خايفين من المتدينيين أو المتطرفين زي ما أحيانا تسموا الناس اللي مش معاكم .. اشتغلوا للشعب المصري .. كفاية اتهام للناس .. وصدقوني برضه إننا المصريين عارفين من الكويس ومين اللي غير كده وحانعرف نختار.
 
الحريات مهمة لينا كلنا وساعدونا نحكم بلدنا صح مش لازم نرضي حد وكفاية الخوف من الغرب ونظرته لينا دا احنا لم اتحركنا كلنا كشعب وقفنا الساعة في الغرب 18 يوم .. الناس بقت تتفرج على الشعب المصري قادر يعمل إيه .. ومش حاتكون مصر كويسة أبداً بعيد عن الدين .. يعني ما ينفعش نتكلم على الحريات من غير ما بنهدل الآخرين .. من غير ما نتهم اللي حوالينا إنهم مش فاهمين .. من غير من نتريق على المصريين .. علشانهم بيحبوا الدين.
 
حاتخسروا كثير قوي بالكلام اللي بيعجب الناس برة مصر لكنه ما بيعجبش المصريين .. واحنا بجد زهقنا من الطريقة دي ومن الكلام اللي مالوش أي علاقة بمجتمعنا ولا بقيمنا ولا بأخلاق المصريين. هل ممكن تركزوا على حل مشاكل الناس وتخلوا بلدنا بلد تنافس أي بلد في الدنيا بأفكاركم واهتمامكم بكل معاني الحضارة اللي ما تتصادمش بقيم الدين.
 
هل ممكن تركزوا على حل مشاكل المصريين بدل ما تحاولوا تغيرونا لمصريين سوبر أو مصريين بلس .. والله إحنا زي ما احنا كويسيين ونقدر نطور بلدنا ونكون احسن ناس من غير ما نغير أخلاقنا ولا قيمنا ولا حتى ضحكتنا وفهلوتنا كمان .. ساعدونا بدل ما تتريقوا علينا يا أخوانا الليبراليين.
 
ما تخافوش علينا .. خليكوا معانا وما تصدقوش أبدا إنكم أحسن مننا كلنا والا انتم فاهمين أكثر منا ولا فوقنا ولا أنتم كمان تحتنا ولا حتى جببنا .. خليكونا معانا جزء مننا .. جوا مصر مش على طرفها وصدقوني عمرنا ما حانخلي مصر كويسة واحنا على طرفها ابدا .. خليكوا معانا .. وما تبعدوش عن وسط مصر .. زي ما كنتم معانا في التحرير!
 
أنا كتبت لأني زهقت .. وعايز مصر تبقى أحسن مش غصب عنكم .. ولكن برضاكم .. واحنا المصريين لا احنا كفرة ولا احنا إرهابيين .. وما تخلوش الناس تشوف مننا إلا أحلى ما فينا .. وهو كثير .. البلد دي عايزة اللي يشتغل لها مش اللي يتكلم عنها ولا عليها ولا حواليها .. مدوا إيديكوا لبعض .. كفاية بقى حكايات التارات البايتة دي .. حاتهدوا مصر فوق دماغكم كلكم ودماغنا احنا كمان .. وساعتها مش حاتلاقوا حد يعمل لينا كلنا صفحة على الفايس بوك تقول إحنا أسفين .. مدوا إيديكوا لبعض .. فانتوا مصريين .. ومصر محتاجة لكم .. والشهداء ما ماتوش علشان اللي انتوا بتعملوا ده .. وما تخلوش دمهم يروح هدر.
 
د. باسم خفاجي – واحد زهقان على الآخر من كل اللي بنعمله في بعض!
فى 18 يونيو 2011

عن محرر

شاهد أيضاً

سلسلة مقالات الثورة (15) – نحتاج إلى ثورة !

في العام الماضي كتبت أننا لا زلنا بحاجة إلى ثورة .. وفي العام الذي قبله …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

[metaslider id=14341]